سيادنا السلام عليكوم ، مرحبا بيكوم ، هاد المرة عاوتاني غادي نقلبوها داريجة ، لأن الدراجة فيها الحرية و هي لغة متمردة شوية ، ماشي بحال الفوصحا ، ملي كاتكتب بيها كايجيك شوية العطش و خاصك ديما يكون الما حداك ، بحال إلى سافرتي فالصحراء ، ونيت راها لغة ديال الصحراء و الرمال واخا عزيزة عليا وكانكتب بها قصص قصيرة ولكن الموضوع لي حنا فيه لابد من الدارجة ، زيد عليها سيبويه و ابن جني و السكاكي حاضيينك ، واياك تزلق فشي حاجة ديال ليعراب ، عكس هاد الزويونة الدريجة الحنينة لي فيها ليطراس ديالنا يعني ليطراس ديال شعيبو ، شوف دابا شي واحد إلى بغا يسب شي واحد بالفوصحا ، ما يفوت ليه جوج كلمات إلى كثر جملة و لا جوج ، وخاصو يحضي معا ليعراب لا يغلط و يجبد على راسو نحل ، ولاكين إلى سبو بالداريجة ، هز مو الماء غادي يجبد ليه الطاصيلة و الفاصيلة ، وويجبد ليه ليه القرون فالقرون ديال الفصل و الأصل ..
وسبحان الله كاينين شي ناس إلى شعلوا بالداريجة شهوة منهوم ما كاينة ، إلى كنتي جمهور غير كاتفرج أرا برعني ، ويلى كنتي الضحية مشيتي فالمزاح غادي تولي ضحكة فالحومة كولها وربما كاع تفكر تخوي ..
ودابا الناس ما عارفينش بلي دراجة سلاح فتاك و بعيد المدى إلى ضربتي بيه العدو ما ينوض على 10 و لا 20 عام حتى يلقاك قضيتي غرض وجمعتي كولشي حب و ثبن ، وتقدر دوخ بيها حتى صحابك و حبابك وجيرانك إلى عينيك ف شي حاجة وبغيتي توصل ليها بديك اللعبة ديال خاوية ف عامرة ، لي كايديروها صحاب السويرتي ، والسريفة ديال الصبع ، وذيك اللهعبة ديال عقل على صوطا ، هاك زيد هاهي أرا يالله أيوا هوب ، مشيتي ما جبتيهاش خسيرتي 50 درهم مشات ، أرا واحد آخر زيد هاك بلاك ، رد البال دير النية تربح ، ربح ربح ربح مول 50 إدي 100 مول والو ما يدي والو ربح ربح ربح ، تساخر أولدي لور شوية … ….
وهاد الدارجة و حق ربي إلى تقدر تسير بها شعب على قدو ، وتنعسو جيعان و عريان بلا مايعيق ، و يلا بزرتيها بشوية ديال الدين خلاص ، راك قاضي غراض ، راكوم شفتو شحال من حرايمي نصب بيها على البسطاء فالحلاقي ، وشحال من نصاب قضا بيها غرض ف لينتخابات ، وشحال و شحال و شحال .. شوف معيا دابا غير التأثير ديال هاد جوج الجومل :
من فضلك أريد منك مساعدة أريد أن اسافر و ليس لدي نقود /.. ها عار البزولة و الميمة تعاونو معيا على المركوب أخوتي ..
شفتو الفرق خطير جدا ، الدريجة قنبولة ما كاينش كاتجبد المصارن ديال بنادم ..
على هادشي رئيس الحكومة ديما كايقلبها دارجة باش إطيح ضبابا على بني غفلون حتى ما يقشعوا والو ، وملي تشوفوه كايدير ديك هاهاها ، راه ديك الساعة جاه الحال ديال الجدبة و خاصو يزيد فالكشكوشة باش شعيبو تا هوا تشدو الشطحة و يتحير شويا ، ويطلع القويلبة بلا ما يشعر ..واش عمركوم شفتو شي واحد يجمع عليه الكج ديال بنادم ، ويهضر بواحدو ويقول ليهوم غادي نخلي عشت بوكوم بإذن الله حيث أنا خدام مع الله ، ويبقاوا حالين قنانفهوم و يضحكو ويقولو وي وي وي وي بحال إلى مفرجين فالماتش ..
هادي راه تايديرها بنكيران لبواجدا ديالو ، واحد النهار جمع منهوم شلا ، وبدا يتعيساوى عليهوم ، الموهيم هو لي فراسو فراسو بغا يدوز ليهوم القويلبة ديال ضرب الوظيفة العمومية وحق الشباب في الشغل ، وبدا كايهضر على الكراد و البق وقاليهوم شحال قدك تقتل ديال الكراد هادشي راه كثير و نتوما راه ما كبرتو فالعروبية باش تعرفو البق و الكراد سولوني أنا هاهاها ، وهما يبداو هاهاهاهاها . سير الله غغرق ليكوم الشقف ..
وهاد ليام كتاشفت بلي ما كاين شي بق و لا شي كراد فالدنيا بحال صاحبنا و رباعتو و البواجدا ديالو، حق الرب ، ولاصقين ومقصدرين ، إلى هضرتي معاه فالغلا و الردة الحقوقية وضرب المكتسبات ، يقول ليك ولو طارت معزة ، إلى قلتي ليه حشومة هادشي لي كادير الحكومة للاساتذة المتدربين ، سليخ و مليخ إقول ليك سرهوم ما عندهومش الحق إتضاهرو فالشاريع ، سمع ناعم آس و لا نتاحر ،
هذا هو الكراد و البق ، وما زال إلى حيانا الله نشوفو كثاااار من هادشي …
داخلنا عليكوم بالله الواحد القهار واش لي كايدوخ علينا بالكراد و البق واش ماشي كاينصب علينا ؟
سمحو لي إلى طولت عليكوم المهيم لساني كانطولو غير على البانضيا ديال هاد البلاد و الله ينجينا من شرهوم وسمهوم ، حيث لي سرق حتى الدين ديال سيدي ربي و كابيع بيه و يشري راه إقدر إدير كولشي ..
…………..الطالبي …………
عذراً التعليقات مغلقة