المشكل الأساسي هو أننا من نهار تنشريو الشوفو وحنا خدامين بيه حتا تنبدلوه أو تيوقع فيه شي مشكيل عاد تنزولوه وراه جميع الناس وحتا الحرفيين ديال الشوفويات مفاهمينش أو غايبة عليهم المعلومة ديال كيفاش الشوفو ديال الحمام تيخنق. وراني تانتحدا أي شخص يقول عكس ما أقول.
أولا….. الشوفو عندو الجيكار gecar هذا الجيكار المهمة ديالو هو من بعد ما تتقوم بشعل الفتيلة الصغيرة يلا فتحتي الروبيني أي الصنوبر ديال الماء بنسبة قليلة الجيكار تيفتح الغاز وتيخليه يمر للفورنو ” الشعلة المركزية” حسب النسبة لي فتحتي ديال الماء وكل ما زدتي نسبة الماء الجيكار تيزيد نسبة الغاز حتا تيوصل لأعلى نسبة ويلا قمتي بإغلاق الماء الجيكار تيقطع الغاز. هادشي حتا لهنا مفهوم مزيان. دبا بغينا نعرفو هاد الجيكار كيف داير من لداخل
تانيا….. الجيكار من لداخل عبارة عن أربعة أنابيب نحاسية صغيرة منظمة لسريان الماء والغاز بطريقة دقيقة جدا هذا الأربعة أنابيب تتفرق إلى إثنتين يمر عبرهما الماء وإثنتين يمر عبرهما الغاز وكل هذه الأنابيب تلتقي عند ثقب كبير إذن السؤال هو كيفاش تتلاقى فثقب كبير يعني راه غادي يوقع إختلاط بين الماء والغاز….. ? إيوا هادي هي المعلومة المهمة لي واجب على كل واحد يرد البال منها….. فهاد الثقب الكبير توجد واحد الكواتشويا عبارة عن فاصل سيليكون يفصل بين الماء والغاز وهو بحجم العشرة دراهم أو أكثر بكثير وهاد السيليكون يكون دوره كالتالي. عندما تقوم بأغلاق الماء يقوم ضفط الماء بالضغط على السيليكون فينتفخ السيليكون ليقوم بدورة بسد الثقب الذي يمرر الغاز وعندما تقوم بفتح الماء ينقص ضغط الماء على السيلوكون ليقوم بدوره بالإبتعاد عن ثقب الغاز مما يسمح له بالمرور حسب نسبة الماء المفتوحة فإذا قمت بفتح الماء على أعلى نسبة تتقلص السيليكون فيمر الغاز على أعلى نسبة للإشتعال وإذا قمت بإغلاق الصنوبر ينتفخ السيليكون مرة أخرى ليقوم بسد الثقب الذي يسمح للغاز بالمرور وهكذا هي دوالي العمل… إذن غادي تقولي وما علاقة كل هذا بمرور الغاز مع الماء.
أقول لكم الإخوان راه السيليكون ممكن يتآكل ولا سيما في المناطق الساحلية أو المناطق لي فيها الكالكير بزاف مما تيجعل أن داك السيليكون الفاصل تيرجع صلب وفاش تايصادف أنك تدخل للحمام وتاتشعل الشوفو ممكن لداك السيليكون يثثقب أو يطرطق مما غادي يسمع للغاز يتخلط مع الماء وتوقع الكارثة لاقدر الله والغاز راه تايخنق مما يؤدي إلى الموت المباشر ولا إسعافات توجد مع الإختناق بالغاز لذلك.
وجب علينا مراقبة السيليكون ديال الشوفو كل فصل شتاء خاصنا نراقبوها كل عام عن طريق حرفي مختص واش مزيانة أو بدات تقصاح راها ثمنها مابين 15 و 20 درهم وتسمى بالمومبرا راه يلا قصاحت تتحراش و متتبقاش تمدد مزيان مما يسمح للغاز بالمرور عبر ثقب بالسيليكون وراكم ضروري تراقبو المومبرا كل عام وإلا ستسمح بمرور الغاز مع الماء مما يؤدي إلى الإختناق المباشر وكذلك ممكن للسيليكون فاش تايقصاح تايرجع يندي الغاز ويوم بعد يوم ممكن الإنسان يتصاب بأمراض خطيرة فالجهاز التنفسي أو الضيقة…..
وراه هذا هو سبب تسرب الغاز مع الماء أما الباقي فهو مجرد خرافات مبنية على جهل مقيت.
وكذلك أنصح بعدم الإستحمام إلا بوجود شخص تاني يكون بالغ في المنزل.
لي ستافد يترحم لينا على واليدينا جميع وبارطاجيو باش نعتقو الأرواح والسلام عليكم ورحمة الله وبركاته.
تارودانت // رشيد بنقشاش
عذراً التعليقات مغلقة